Korporativ satışda yeniyəm haradan başlayım?
Satışa keçməyi planlayırsınız və ya bu sahədə yenisinizsə, sizi təbrik edirəm. Dünyanın ən maraqlı və eyni zamanda ən çətin işinə xoş gəlmisiniz. Satış maraqlıdır, çünki daha çox insanla tanış olmaq, əlaqələrinizi genişləndirmək imkanınız olacaq. Bir də gördünüz satış görüşünə getmisiniz, müştəri sizə iş təklif edir (Dubayda başıma gəlib).
Çətindir ona görə ki, ümumiyyətlə məsələyə pul qarışanda insanlarla işləmək çətin olur. Çünki hər kəsin bir reallığı, bir inancı var. Və biz (bədbaxt) satış adamları insanları öz inanclarını sorğulamağa, yenidən düşünməyə, illərlə topladıqları vəsaiti bizim məhsul üçün xərcləməyə çağırırıq. Və bütün bunların hamısını sehirli çubuq olan, dilimizlə etməyə çalışırıq Atamın gözəl bir sözü var, deyir ki, “camaatla işləmək çətindi”. Doğurdan da çətindir. Lakin müqayisə edəsi olsaq B2B satışı B2C satışından daha rahatdır. İstər kommunikasiya və nə istədiyini bilmək, istərsə də qayda-qanun baxımından şirkətlər, individual alıcılardan 5-0 öndədirlər.
Abreviaturaların açılışı:
B2B - Business to Business (korporativ satış)
B2C - Business to Customer (pərakəndə satış)
D2D - Door to Door (pərakəndə satış)
İndi isə keçək işin praktiki tərəfinə. Korporativ satışa başlayacaqsınızsa bunlara diqqət etməyiniz şərtdir:
- Ünsiyyət - Satışda səlis və axıcı ünsiyyət qura bilmək çox önəmlidir. Məhsulunuz nə qədər yaxşı olsa da əgər düzgün danışa bilmirsinizsə heç kim sizi dinləmək istəməyəcək.
- Bədən dili - Bir çox ekspert də razılaşır ki, fiziki görüşlər zamanı arada baş tutan ünsiyyətin 93 faizi sözolmayan ünsiyyətdən ibarətdir. Buna 55% bədən dili, 38% səs tonu, 7 faiz isə söz seçimi daxildir. Yəni sizin nə dediyiniz yox necə dediyiniz önəmlidir.
- Məhsulla bağlı ekspert - Satdığınız məhsulun içini-çölünü bilməlisiniz. Yadıma gəlir Abu Dhabidə ofisiant işləyəndə bizə hər zaman deyirdilər ki, insanlara təklif etdiyiniz yeməklərin tərkibini aşpaz qədər bilməlisiniz. Sizin aşpazlardan yeganə fərqiniz yeməyi necə hazırlamalı olduğunuz bilməmək olmalıdır. Əgər müştəri məhsulla bağlı sizdən çox bilirsə vəziyyət qəliz olacaq. Çünki insanlar ekspert olaraq gördüyü kimsələrdən alış etməyə üstünlük verirlər.
- Geyim - Korporativdəsinizsə fiziki görüşlər qaçınılmaz olacaq. Necə deyərlər, sizi geyiminizə görə qarşılayıb, zəkanıza görə yola salacaqlar. Məsələ orasındadır ki, yaxşı satış adamı yaxşı qazanır, yaxşı qazanan da yaxşı geyinir. Yaxşı geyinməyən demək ki, yaxşı qazanmır və demək ki, yaxşı satış adamı deyil. Bir az dərinə getdim, amma həqiqətən də insanlar geyimə diqqət edirlər. Unutmayın ki, siz həm də şirkəti təmsil edəcəksiniz. Ona görə də geyiminizə yatırım etməlisiniz.
- Şəbəkələşmək - İngilislərdə gözəl bir ifadə var, “Sənin şəbəkən, sənin xalis dəyərindir”. Həqiqətən də korporativ satış adamının bazar dəyəri onun portfoliosu ilə ölçülür. Ona görə də nə edirsinizsə edin, şəbəkə görüşlərində iştirak edib əlaqələrinizi genişləndirin. Eyni zamanda cari müştərilərinizlə də əlaqənizi möhkəm saxlayın, taaa o yerə qədər ki, siz başqa şirkətə keçsəniz onlar da sizin arxanızca gəlsinlər.
- Daima pozitiv olun - Satış asan iş deyil. Hətta korporativ olsa da belə arada qeyri-peşəkar komandası olan şirkətlərlə danışmalı olacaqsınız. Belə hallarda əsəb və eqonuzu idarə altında saxlamalısınız. Çünki bazar balacadır. Kiçik bir səhv addım, bazarda həm çalışdığınız şirkət, həm də öz adınıza pis təəssürat formalaşdıracaq.
Məndən hələki bu qədər. Növbəti məqalədə introvert olmağın satışa təsirindən danışacam.
Satışla bağlı heç bir sosial media platformasında paylaşmadığım praktiki postları buradan izləyə bilərsiniz - Satış Sadə Dildə
Odur ki, görüşənədək.
